Monday, August 02, 2010

夏日炎炎正好........點呢?


唉!返到香港都重係咁樣!熱就唔駛講啦,D「新聞」都係陳年舊聞:八達通出賣港人私隱、亞視缺水股東不和、白鴿黨英甲「論壇」被圍毆、西隧加價離哂大譜.....喂!港人冇私隱權老早知啦!係立法會都唔知講咗N次,要佢修改私隱例唔肯,立法保障消費者權益又唔肯,講來講去只有港人自講,政府同商界都懶理,點算係新聞?至於亞視缺水亦唔係新聞。喂,缺水都缺咗+幾ニ十年囉,換股東好似跑馬仔咁真係見怪不怪啦,要改變首先要打破無線嘅壟斷;呢個問題,又係喺立法會講到口水都乾喇,又有鬼用呀?到白鴿黨呢單嘢更唔係新聞,搞來搞去都係果班人,果個話題,白鴿黨一日未被鬥垮鬥臭,重有排玩呀,話知你依家投票人人平等,總之係白鴿黨做嘅就係衰嘢。唉!算啦!報都無謂!講到西隧,咪又係講到悶哂?唔知要求政府收回三隧一橋講咗N次啦,你估有人聽得入耳咩?總之你死你事,話之佢啦!
喂,話時話,聽講話係約旦雖然未有民主,但國王都肯自己出錢起免租居所、提供免費醫療福利、傷殘人士工場等。唉!大家都無民主,但人家最少有個心,你老曾又有D乜呢?

No comments: