心底話

阿曾老闆， 想同你講呢番心底話好耐。

記得當有老友介紹我見呢份工嗰陣時，攞命陳（其實我都唔見得佢有幾攞命，不過人哋咁叫，我又跟吓啦）淨係同我講我要跟隨曾老闆你嘅政治理念，但老實講，我搞嚟搞去都唔知你嘅 政治理念係咩。從傳媒睇到、聽到嘅，都只係知道你唔肯為香港人爭取普選，又唔肯企響工人嗰邊，對啲水深火熱嘅基層市民，你又唔肯幫佢哋；唯一你 friend 嘅就係得啲大商家，或者同北京有密切關係嘅社會名人。你又鍾意用法律手段去打擊同你意見唔同嘅人，但你又要凌駕於法律之上，好似反種族歧視同埋尊重傷殘人 士嘅法例同措施，你都話唔關政府事，不受規管。我以前都略略睇過一啲政治學嘅書，但係都搵唔到呢種政治理念。如果唔係人工咁高，我都唔知點認同？

無錯，我以前啲人工少過依家幾倍，呢樣嘢亦係我應承同你打工嘅原因，但係你又同人講，話要培養我做政治人才，真係有啲唔好意思。睇在攞咗咁多納稅人嘅錢份 上，我唯有默認。但老實講，如果我真係想為民請命而參政嘅話，早就加入咗公民黨啦。又或者如果我要抽政治油水，我梗係早就入咗民建聯或者自由黨啦，仲使等 今日？不過睇錢份上，你話點就點啦。

但係最攞命嘅，係你一方面響香港人面前死撑，一方面又要我放棄鬼咁辛苦至攞到嘅外國護照，仲要我同人講，話係自動放棄，真係幾惡搞！至於我嘅人工，我其實 唔多想講，因為實在高到我自己都有啲唔好意思，但係依家你又話最好我自爆，真係乜嘢醜人都要我做晒，都幾唔公平喎！如果你問我，我就覺得你應該自己講清楚 請我嘅真正原因，我嘅職權係咩，你希望我將來做咩，唔好搵我做擋箭牌，因為我實在咩都唔知㗎。

呢番心底話我唔知你啱唔啱聽。無論如何，睇錢份上，我都會做好呢份工嘅，請你放心！